Zamura Ijwi Ryawe: Abatunganya Ibiganiro ku Mbuga Nkoranyambaga Basabwe Gukoresha Ijambo Ryabo mu Murimo w'Ivugabutumwa

Abatunganya ibiganiro n'abavuga rikumvikana ku mbuga nkoranyambaga (content creators) barenga 160 bateraniye ku cyicaro gikuru cya Diviziyo ya Afurika yo Hagati n'Iburasirazuba (ECD) i Nairobi muri Kenya, ku itariki ya 19 Kanama 2026, mu itangizwa ry'Inama ya ECD y'Abatunganya Ibiganiro.

Dr. Moses Maka, wari Umunyamabanga Mukuru wa ECD icyo gihe, akaba ubu ari Perezida wayo, yatumiye Umukuru Yohannes Olana, Umubitsi wa ECD, ngo atange ijambo nyamukuru.

Kuvuga mu izina ry'Imana mu isi itega amatwi

Ashingiye kuri Yesaya 58:1, Umukuru Olana yibukije abo batunganya ibiganiro ko isi ibatega amatwi, kandi ko ibyo batangaza ari inzira yo gukora umurimo w'Imana. Yabagereranyije n'abavuga rikumvikana, intumwa n'abarinzi, bagira uruhare mu bitekerezo by'abantu no mu byo bitaho.

Yabasabye kwibaza niba imbuga zabo zizana amacakubiri cyangwa ubumwe, niba zibamamaza ubwabo cyangwa zihesha Imana icyubahiro, kandi niba zongera urusaku cyangwa zigeza ku bantu ukuri. Yavuze ko aho guhatana n'andi majwi, bakwiye gukomeza kuba indahemuka ku ijwi ry'Imana.

Yifashishije Ibyakozwe n'Intumwa 4:20, aho Petero na Yohana bavuze ko badashobora kureka kuvuga ibyo babonye n'ibyo bumvise, yashimangiye ko kwamamaza ubutumwa bwiza bitagenewe abapasitoro cyangwa abanyamwuga mu itumanaho bonyine. Yongeyeho ko intego y'itangazamakuru atari ukugera ku bantu benshi gusa, ahubwo ari ukubahindura by'ukuri, nk'abamarayika bo mu Byahishuwe bajyana ubutumwa bwiza bw'iteka mu isi yose.

Inshingano eshatu

Umukuru Olana yasigiye abatunganya ibiganiro inshingano eshatu:

• Kumenya abo ari bo: kumenya abo ari bo n'uwo ari we ubatunze, bashinze imizi muri Kristo.
• Ubumwe: umurimo umwe, nubwo bava mu bihugu, mu mico, mu ndimi no ku mbuga zitandukanye.
• Umurimo w'ivugabutumwa: buri mwizera na buri rubuga bishobora kuba umuyoboro wo kugeza ku bantu ubutumwa bwiza.

Yasoje ahamagarira buri wese utunganya ibiganiro ko byihutirwa: “Zamura ijwi ryawe!”

Rwanda Union Mission irashishikariza Abadiventisiti batunganya ibiganiro mu Rwanda hose gukoresha imbuga zabo mu gusangiza abantu ibyiringiro n'ubutumwa bwiza bw'iteka.

Inkomoko: Diviziyo ya Afurika yo Hagati n'Iburasirazuba, 21 Kanama 2026.